ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានអបអរសាទរកម្ពុជាដណ្តើមបានមេដាយក្នុងព្រឹត្តិការណ៍ស៊ីហ្គេមឆ្នាំ២០២៣ សរុបចំនួន២៨២ មេដាយមាស៨១ មេដាយប្រាក់៧៤ និងមេដាយសំរិទ្ធ១២៧។
សម្តេចតេជោ បានបញ្ជាក់ថា មេដាយដែលកម្ពុជាទទួលបាននៅឆ្នាំនេះមានការកើនឡើង បើធៀបនឹងឆ្នាំ១៩៩៩ ពោលកម្ពុជាឈរក្នុងតារាងលេខ១០ ជាមួយនិង ០មេដាយ។
សម្តេចតេជោ បានសរសេរនៅក្នុងឆាណែលតេឡេក្រាមនៅព្រឹកថ្ងៃទី១៧ ខែឧសភា ឆ្នាំ២០២៣ ដូច្នេះថា៖ «នេះជាសមិទ្ធផលរបស់ប្រជាជាតិទាំងមូលដែលប្រឹងងើបឈរឡើងក្នុងការកសាងជាតិនិយាយជារួមនិងក្នុងវិស័យកីឡានិយាយដោយឡែក»។
ការប្រកួតកីឡាស៊ីហ្គេមឆ្នាំ២០២៣ បានបញ្ចប់នៅថ្ងៃទី១៦ ខែឧសភា ឆ្នាំ២០២៣ ដោយវៀតណាមឈរលេខ១ ដែលទទួលបានមេដាយច្រើនជាងគេ ខណៈកម្ពុជាឈរលេខរៀងទី៤។ កាលវៀតណាមធ្វើជាម្វាស់ផ្ទះព្រឹត្តិការណ៍ស៊ីហ្គេមឆ្នាំ២០២១ វៀតណាមដណ្តើមបានមេដាយច្រើនជាងគេ។ នៅឆ្នាំនេះប្រទេសទីម័រខាងកើត ឈរនៅបាតតារាង ដែលមានមេដាយតិចជាងគេ ហើយពុំមានមេដាយមាសឡើយ ដោយមានត្រឹមមេដាយសំរឹទ្ធចំនួន៨។
គូសបញ្ជាក់ថា នៅថ្ងៃនេះទី១៧ ខែឧសភា ឆ្នាំ២០២៣ កម្ពុជានឹងប្រារព្ធពិធីបិទព្រឹត្តិការណ៍ស៊ីហ្គេមឆ្នាំ២០២៣ នៅពហុកីឡដ្ឋានមរតកតេជោ។ ការប្រកួតកីឡាស៊ីហ្គេមបានចាប់ផ្តើមធ្វើឡើងពីថ្ងៃទី០៥-១៧ ខែឧសភា ឆ្នាំ២០២៣។ ជាបន្តទៀតនេះ កម្ពុជានឹងរៀបចំការប្រកួតកីឡាអាស៊ានប៉ារ៉ាហ្គេមលើកទី១២ ចាប់ពីថ្ងៃទី០៣-០៩ ខែមិថុនា ឆ្នាំ២០២៣ ខាងមុខនេះ៕
